Kaiku abeltzaintza kooperatibako ordezkariekin eta bazkideekin bildu gara gaur goizean, emakumeek erabaki organoetan parte har dezaten sustatzeko ematen ari diren urratsak ezagutzeko. Gizarte gisa konpondu gabe daukagun arazoetako bat da, eremu sozioekonomikoan berdintasuna sustatzea, bereziki emakumeek zuzendaritza kontseiluetan duten presentzia aktiboa. Foru Aldundiaren konpromisoa berretsi nahi dugu, bere kulturan, estrategian eta kudeaketa ereduan berdintasunerako urrats eraginkorrak ematen ari diren erakundeei irmotasunez laguntzeko.
Genero Berdintasunaren Indizea 2020an argitaratu zen lehen aldiz Gipuzkoarako berezko neurketekin, eta 72,5 punturekin kokatzen du gure lurraldea arlo horretan, eta 100 da erabateko berdintasunari dagokion balioa. Zifra horren arabera, Gipuzkoa Europako batezbestekoaren gainetik dago, eta berdintasunari dagokionez, herrialde aurreratuenen atzetik: Finlandia (73,4), Frantzia (74,6), Danimarka (77,5) eta Suedia (83,5). Hala ere, gogorarazi du botere ekonomikoaren eremuan agertzen dela gehien genero desberdintasuna, eta atal horretan indizea 41,9 puntukoa dela.