Etiketa: xabier ezeizabarrena

“Gipuzkoak ezin du egonkortasuna eta aurrerabidea dituen etorkizuna arriskuan jarri”

Posted on by markel

DEBA. Diputatu nagusi izateko EAJ-PNVren hautagai den Markel Olanok gogoratu du gaur lurraldeak asko duela jokoan datorren maiatzaren 26ko udal eta foru hauteskundeetan eta, ohartarazi duenez, “Gipuzkoak ezin du egonkortasuna eta aurrerabidea dituen etorkizuna arriskuan jarri”. “Jokoan dagoena zera da: edo oraingo egonkortasun eta indarrarekin aurrera egiten jarraitu, edo atzera egin, iraganeko ezegonkortasunera eta kudeatzeko gaitasun faltara itzultzea. Gipuzkoak ezin du arrisku hori hartu”, nabarmendu du hautagai jeltzaleak.
Debako hautagaitza jeltzalearen aurkezpenean hartu du parte gaur Olanok, udalerri honetako Pasealeku Estalian egin dena. Iñigo Cambronero da EAJ-PNVren alkategaia, eta ekitaldira dozenaka alderdikide eta jarraitzaile hurbildu dira, inguruko herrietako hautagaiekin batera. Debako EAJ-PNVren hautagaitza honako pertsona hauek osatzen dute: Iñigo Cambronero alkategaia buru, zerrendan daude Eneritz Gomez, Miren Esnal, Joseba Andoni Aizpurua, Alazne Txurruka, Edurne Rodriguez, Iñaki Mandiola, Gaizka Azkoitia, Ariadna Veliz, Mikel Lopez, Miren Josune Urain, Maria Teresa Iruretagoyena eta Cristobal Del Corte.
Diputatu nagusi izateko hautagaiak, bere hitzaldian, nabarmendu du Gipuzkoa “ikaragarri indartu dela” legealdi honetan. Alde batetik, esan du “elkarbizitza eta klima sozialak nabarmen egin dutela hobera”, batez ere lurraldeko erakundeek “gizartearekiko mesfidati izatetik entzuera pasa direlako”. Gainera, esan du indartu egin direla ongizate eredua eta gizarte kohesioa, ezberdintasunak murriztu egin baitira.
“Legealdi honetan, blokeo egoera batetik hasi eta Gipuzkoak bere modernizaziorako behar zituen proiektuak seriotasunez, eraginkortasunez eta zorroztasunez gauzatzera pasa gara”, azpimarratu du Olanok. Horrela, adibide bezala jarri du hondakinen kudeaketaren arazoa konpondu izana, edota Bizkaira bidaiatzen dutenentzat AP-8ko bidesarietan 75 euroko tarifa plana ahalbidetu duen akordioa. Debako tokiko aktualitatera etorrita, ibaiaren gaineko zubiaren erortzea bezalako arazo konplexu bati emandako “erantzun azkar eta eraginkorra” gogoratu du Olanok, gaiari irtenbidea eman eta bizilagun kaltetuei alternatibak eskaintzeko.

Etorkizuneko proiektua
Hautagai jeltzaleak, honenbestez, ondorioztatu du EAJ-PNVk duela lau urte gipuzkoarrei eman zien hitza bete duela. Deba bailarari aipamen eginez, gogoratu du egungo Aldundiak “lehentasun osoa” eman diola industriari, bereziki Debabarrenan presentzia nabarmena duen makina-erremintaren sektoreari. Gainera, gogoratu du lau urte hauetan “zor historikoa” kitatu dela Deba eta Mutrikurekin, bi udalerriak lotzen dituen errepidea hobetzeko obren hasierarekin.
“Gainera, aurrera begira, EAJ-PNV etorkizuneko proiektua du Gipuzkoarentzako, guztion artean lurralde indartsuagoa eraikitzen jarraitzeko”, aldeztu du. Diputatu nagusi izateko hautagaiak azpimarratu du lurraldea prestatzeko garaia dela, “hurrengo belaunaldiek ere bizi kalitate ona izan dezaten”. Estrategia horren adibide bezala jarri ditu legealdi honetan egin diren apustu estrategikoak, etorkizuneko gaietan erreferentziazko zentroak martxan jarri, esaterako, elektromugikortasun, zahartze osasuntsu edota zibersegurtasunaren esparurruetan. “Gizartea entzuten eta konfiantza adierazten jarraitzea eskaintzen du EAJ-PNV; zorroztasunez eta segurtasunarekin proiektuak gauzatzen jarraitzea; ekonomia eta ezberdintasunaren aurkako borrokari lehentasun osoa ematen jarratzea. Gipuzkoa indartsuagoa eraikitzen jarraitzea eskaintzen dugu”, nabarmendu du.

Deba indartsua
Bere aldetik, Debako alkategai jeltzalea den Iñigo Cambronerok Udalak legealdi honetan egin duen lana nabarmendu du, bera zinegotzi izan baita. Azaldu duenez, honen ondorioz erabaki du aurrerapausoa eman eta EAJ-PNVren hautagaitzaren buru jartzearen erronkari eustea. “Lau urte hauetan egin dugun lana eta bizi izan dudan guztiak sortu dizkit EAJ-PNVren Debako proiektuaren buru jartzeko behar nituen gogo eta ilusioa”, adierazi du.
Horrela, Cambronerok gogoratu du duela lau urte debarrek aldaketaren alde egin zutela eta, lau urte hauetan, “transformazio horretan aurrerapausoak eman ditugu”. Hala ere, esan du “bidea hasi besterik ez dela egin” eta, ondorioz, EAJ-PNVren proiektuari bidea emateko eskatu du, Deba transformatzen jarraitzeko. “Gure herriak gobernu indartsua eta gai dena merezi du, hobekuntza sozialak eta garapen ekonomikoa oinarri dituen herriaren transformazioaren lidergoa hartu eta gauzatzen dakiena”, azaldu du.
Maiatzaren 26ko hitzorduari begira jarrita, esan du Debako herritarrek euren buruari egin behar dioten galdera honakoa dela: “edo EAJ-PNVrekin aurrera egiten eta etorkizunari begiratzen jarraitu, edota berriro ere iraganean katigatu”. “Guretzako erantzuna oso argia da, Debak EAJ-PNVren aldeko apustuarekin jarraitu behar du”, defendatu du. Cambronerok adierazi duenez, bere hautagaitzak Udala eraginkortasunez kudeatzen jarraitzeko “proiektuak, ideiak, ilusioa eta gaitasunak” ditu, “Deba berriro ere eskualdearentzako estrategikoa izan dadin, gure herriaren garapenari ekarpenari egingo dioten inbertsioak lortuz”. “Zuen babesarekin eta talde honekin, denon artean, aurrera egitea lortu eta etorkizuneko Deba eraikiko dugu”, amaitu du.

“Etorkizuneko ekonomiara eta kohesio sozialera bidean jauzi berria emateko unea da”

Posted on by markel

DONOSTIA. Gipuzkoako diputatu nagusi izateko EAJ-PNVren hautagai den Markel Olanok gaur goizean aurkeztu ditu datozen foru hauteskundetarako programaren oinarriak. Nabarmendu duenez, “kalitatezko enplegua” eta “pertsonen ongizatea” bultzatzeak izango dute “lehentasun osoa”. Olanok “kudeaketa bizi eta eraginkorra” eskaini die Gipuzkoako herritarrei, lurraldea ekonomikoki eta sozialki indartzen jarraitzeko eta Gipuzkoa ireki, lehiakor eta dinamikoa eraikitzen segitzeko.

“Gipuzkoak asko egin du aurrera legealdi honetan. Duela lau urte baino sendoagoa da. Gure ekonomiak eta gure enpresek indartzen jarraitzen dute, eta gizarte desberdintasunak murriztuz doaz”, esan du Olanok, Gipuzko Buru Batzarraren egoitzan elkartu diren hedabideen aurrean. Hala ere, gehitu duenez, lurraldeak “ezaugarri eta baliabide nahikoa” ditu maila guztietan “apustu berriak” egiteko, betiere “anbizio eta berrikuntzaren” ikuspegietatik. “Gipuzkoako indartzen jarraitzeko unea da, etorkizuneko ekonomia eta gizarte kohesionatuago baterantz jauzia emateko momentua”, aurreratu du.

Diputatu nagusi izateko hautagaiak bere hauteskunde programak jasotzen dituen hamar lan lerroak xehatu ditu. Ideiak hauek datozen asteetan osatuko ditu alor ezberdinetako adituen ekarpenekin, eta lurraldeko ehun ekonomiko eta sozialaren ordezkarienekin. Lan talde bat jada ari da dinamika honetan lanean, Olanok azaldu duenez. Lurraldeko hauteskunde barrutietako EAJ-PNVren hautagaitzen buru diren Eider Mendoza, Maria Eugenia Arrizabalaga eta Xabier Ezeizabarrena egon dira berarekin aurkezpenean.

Olanok gogoratu duenez, “kudeaketa eraginkorra” eta “ondo eginiko lana” EAJ-PNVren ezaugarri nagusiak dira, eta baita legealdi honetan Foru Aldundian egindako lanarena ere. Gainera, gizartea erabaki guneetara gerturatzea lortu da, partaidetza eta gardentasunaren bitartez. “Gobernu estilo honek ez dauka atzera bueltarik, eta datorren legealdiak hau egonkortzeko balio behar du”, esan du. Aurrera begira, eraginkortasun eta gertutasunetik lanean jarraitzeko konpromisoa hartu du, Gipuzkoak aurrera pausoak ematen jarrai dezan aipatutako hamar alorretan.

Lehenik eta behin, hautagai jeltzaleak gogoratu du gure enpresen “posizioa” nabarmen hobetu dela azken urteetan, industria jarduera egonkortu eta langabezia tasa %8 arte jaitsi baita. “Honek izan behar du ekonomia berria bultzatzeko oinarria, eta honela enplegu gehiago eta hobeagoa sortzeko”, proposatu du. EAJ-PNV osatzen ari den programak, beraz, hainbat neurri jasoko ditu enpresen modernizazioa bultzatzeko, enpresa txiki eta ertainak indartu, teknologia garapena eta etorkizuneko sektoreak indartu, enpresa ehunaren lehiakortasuna merkatu berrietan bermatu eta lankidetza eta ekintzailetza aldezteko.

“Ekonomia indartsua izateak ez du ezertarako balio ez badago pertsonen zerbitzura”, adierazi du. Honenbestez, “pertsona guztien ongizatea eta integrazioa bermatzea” izango da bere programako “bigarren lehentasun puntua”. Olanok gogoratu du legealdi honetan “nabarmen” zabaldu direla kolektibo ahulenentzako arreta zerbitzuak, eta zahartzea eta inklusioaren erronkei aurre egiteko lurralde estrategien oinarriak jarri direla. Hemendik abiatuta, Gipuzkoako gizartea indartu eta kohesionatzen jarraitzean jarri du azpimarra Olanok. Horretarako, zerbitzu sozialak babestu eta bultzatu, zahartze osasuntsu eta aktiboa bermatu, gizarte ezberdintasuna borrokatzeko programak garatu eta bazterkeria arriskuan dauden pertsonen lan eta gizarte integrazioaren alde lan egiteko konpromisoa hartu du.

 

Berdintasunarekin konpromisoa duen Gipuzkoa

Gainerako lan lerroei dagokionean, EAJ-PNVren arabera, bere programak politika berria sustatu eta gobernatzek modu “parte hartzaile eta gertukoa” sustatzen jarraitzeko erabakia islatuko du, “komunitateari ematen diogun zerbitzua” Aldundiaren ezaugarri nagusi bihurtuz. Laugarren puntuan, “berdintasun eta aniztasunarekin konprometituta” dagoen Gipuzkoa eraikitzen jarraitzeko nahia jaso du Olanok, helburua Europa mailan ezberdintasun gutxien duten lurraldeen artean kokatzea izaki, gizarte, ekonomia eta genero ikuspegietatik. Horretarako balio demokratikoak indartuko dira, emakume eta gizonen arteko berdintasuna eta identitate aniztasuna.

Bosgarren puntuan, lan lerro nagusien artean kokatzen da euskara “umetatik” indartzea. Horretarako hizkuntza honen aldeko babes soziala indartzea aurreikusten da, ikasketa eta erabilera bultzatu eta euskarazko ikus-entzunezko edukien sorkuntza sustatuz.

Gainera, Olanok gogoratu du Gipuzkoak “lidergoa hartu dezakeela klima aldaketari aurre egiteko gizarte transformazioan”, betiere ere “denok serio hartzen badugu gai hau”, lurraldearentzako ere “hil ala biziko” kontua baita. Honela, bere programak proposamen berriak jasoko ditu “ingurugiroari begira politika espezifikoa” garatzeko, herritarrak kontzientziatzeko eta CO2 isurketak murrizteko. Hau guztiagatik, diputatu nagusiak konpromisoa hartu du garraio publikoaren erabilera “bultzatu eta indartzeko” bere zazpigarren lan lerroan, “errepide sare eta garraio publiko jasangarriak” lortzeko bidean. Lurraldeko errepide guztien modernizazioan aurrera egin eta sarearen kudeaketa adimentsua sustatzea ere faktore “kritikoak” dira lurraldearen etorkizunerako, Olanoren ustetan.

Azkenik, eta programaren oinarriekin jarraituta, EAJ-PNVk pertsona guztientzako “kultura eta kirolerako sarbidea” bermatzeko konpromisoa hartzen du, eta baita ere bizikidetza “gizartearen balio nagusi” bihurtu eta gure autogobernua indartzeko, “gure egonkortasuna eta aurrerabidea sostengatzeko”.