Kategoria: Etorkizuna Eraikiz

Gobernantzaren berrikuntzan erreferentzia bezala kontsolidatu da Arantzazulab bere lehen urtean

Posted on by markel

Gobernantzaren berrikuntzan erreferentzia zentro eta gizarte berrikuntzan katalizatzaile gisa kontsolidatu da Arantzazulab Gizarte Berrikuntzako Laborategia, bere ibilbidearen lehen urtean. Lehen hamabi hilabete hauetan proiektua guztiz kontsolidatu da eta laborategiari oinarri sendoa ezarri zaio. Etorkizuna Eraikiz estrategiaren markoan Arantzazulab gobernantzan erreferentzia zentro bezala kokatzeak, gobernantzaren berrikuntzaren esparruan ardaztera eraman du laborategiaren jarduna, bertan zein nazioartean arreta piztuz. Emaitzak ere aipagarriak izan dira: lehen urtean, 165 eragile baino gehiagorekin kontaktua egin du, 85 elkarlanean aritu da, 7 batzordetan parte hartzen du eta 9 lankidetza hitzarmen sinatu ditu.


Gaur goizean bisitatu dugu azpiegitura eta Arantzazulab-eko sustatzaile diren Fundazio buruekin (Gipuzkoako Foru Aldundia, MONDRAGON Korporazioa, Kutxa Fundazioa, Oñatiko Udala eta Arantzazuko Frantziskotarren Probintzia) eta Naiara Goia laborategiko zuzendari nagusiarekin batera, laborategiaren lehen urteko balantze bilera izan dute Arantzazulab-en egoitzan, Arantzazuko Gandiaga Topagunean (Oñati). Eragile denak ados gaude esaterakoan zentroak misio argi bat duela: elkarlaneko gobernantzaren inguruan ezagutza garatzeko gure herriko gunerik garrantzitsuena izatea, herrigintzaren, erakunde sistemaren eta gizarte eragileen zerbitzura egongo dena. Lehen hamabi hilabete hauetan, erreferentzialtasun hori lortzeko oinarri sendoa jartzen hasi gara.

Laborategiak gizarte berrikuntzan zubigile eta katalizatzaile izateko rola du: Gure herriko eta nazioarteko askotariko eragileekin konfiantzazko harremanak landu, sareak eraiki eta lankidetzak sustatu ditu: erakunde publikoekin, elkarteekin, antzeko laborategiekin, fundazioekin, gizarte eragileekin eta enpresekin, politika- eta herri-ekimenekin. Honekin batera, Arantzazulab herritarren topagune izateko ere sortu zen , adostasun zabalen gune izateko, sentsibilitate eta ikuskera ezberdinak batzeko, zein Euskal Herriko kultura politiko ezberdinekin lan egiteko. Horregatik, laborategiari aitortu dizkioten ekarpenen artean Topagune Neutral izaeraren aitortza nabarmendu nahiko nuke; izan ere, hainbat eragilek hausnarketa askerako topagune eta esperimentazio berritzailerako babes gune gisa definitu dute Arantzazulab lehen urteko ibiliaren ostean.

Urte amaieran abian izango da Usurbilgo egoitza aitzindari eta berritzailea

Posted on by markel

Urte amaieran abian izango da Matia Fundazioa Usurbilen egiten ari den egoitza, Gipuzkoako Foru Aldundiarekin eta Usurbilgo Udalarekin elkarlanean. Proiektu aitzindari eta berritzailea da, 2020ko ekainean hasi ziren eraikuntza lanak, eta 110 etxebizitza egingo dira 127 adinekorentzat; argi eta garbi erakutsiz norantz doan Gipuzkoako zaintza eredua, egoiliarren autonomia eta arreta pertsonalizatua bultzatzen duten bizikidetza unitate murriztuetan oinarrituta dagoena.

Zentro berri horretan etxebizitza kontzeptua berreskuratzen da, etxea bizitzeko espazio gisa ulertuta, edozein modutara dela ere, etxekoa bezalako giroa sortuta. Logelen ordez, zaintza zerbitzua eskaintzen duten etxebizitza txikiak egongo dira, komunitateari konektatuta eta irekita dagoen ingurune batean, non pertsona jarduera osoaren erdigunean jartzen den. Pertsonak, haien ongizatea, autonomia eta zainketen kalitatea dira Gipuzkoako gizarte politiken ardatz nagusia. Proiektu honek bultzada handia ematen diola azken urteotan lurraldean garatzen ari den zaintza ereduaren eraldaketari, berrikuntza, pertsonalizazioa eta komunitatearekiko lotura eta hirugarren sektore sozialeko erakundeen eta entitateen arteko lankidetza bitarteko direla, hori baita gizarte politiken Gipuzkoako ereduaren ezaugarri nagusietako bat.

Zentroak 127 plaza izango ditu mendekotasuna duten adinekoentzat; 110 zaintza zerbitzuak dituzten etxebizitzak izango dira, horietako 93 banakakoak eta 17 bikoitzak, bikoteentzat edo senitartekoentzat. Gainera, etxebizitzak 7 bizikidetza unitatetan antolatuko dira, eta horietako bakoitzak 18 pertsona izango ditu. Espazio zabalagoak dira, 30 eta 38 m2 bitartekoak, eta sukalde txiki bat, egongela, logela eta bainugela izango dituzte. Hori guztia pertsonalizatzeko modukoa izango da, eta egoiliar bakoitzak altzariz hornitu ahal izango du, horrela, ingurune goxoagoak osatzeko. Usurbilgo zentroak, zaintzapeko etxebizitzez gain, bi unitate psikogeriatriko izango ditu, bakoitza 15 plazakoa, eta eguneko zentro bat, 40 plazakoa.

Gipuzkoak eta Pirinio Atlantikoek harremanak sendotu dituzte mugaz gaindiko lehen partaidetzazko aurrekontuekin

Posted on by markel

Gipuzkoako Foru Aldundiak eta Pirinio Atlantikoetako Departamentuko Kontseiluak beren lankidetza indartzea erabaki dute eta, horretarako, mugaz gaindiko lehen partaidetzazko aurrekontuak jarriko dituzte abian. Ekimen horretara 300.000 euro bideratuko dira guztira (150.000 euro erakunde bakoitzak), eta lehen mailako lankidetzazko mugarri bat da bi erakundeentzat, kontuan hartuta apustu irmoa egiten dutela topaketan, inklusioan eta lankidetzan oinarritutako Europa bat eraikitzearen alde.


Partaidetzazko aurrekontuen proiektua, zehazki, mugaz gaindiko ekimen eta proiektuen garapena bultzatzeko funts komun bat sortzean datza, alde bietako herritarren eta elkarte-sarearen proiektuetara bideratutako dirulaguntzak emanez, arreta berezia jarrita gazteengan. Zehaztu behar da erakunde bakoitzak egindako deialdi paraleloen batura izango dela deialdi bateratua. Deialdian jasotako herritarrentzako orientazioa bi unetan islatzen da: alde batetik, proiektuak aurkezteari dagokionez, eta, bestetik, proiektuak hautatzeko prozesuari dagokionez. Azken fasean, herritarrek erabakiko dute, beren botoekin, zer proiektuk jasoko duten azkenean eratutako funtsaren dirulaguntza.

Proiektua Etorkizuna Eraikiz foru programaren barruan kokatzen da, Aldundiak ekimen horretan sartu baitu Pirinio Atlantikoetako Departamentuko Kontseiluko agintariekiko mugaz gaindiko lankidetza, bere internazionalizazio lerroaren barruan. Izan ere, Etorkizuna Eraikiz programak dituen funtsezko ezaugarriak, hala nola lankidetzazko gobernantza bultzatzea, eragile ugari inplikatzea, eta esperimentazioa sustatzea, erabat zentzuzkoak dira mugarik gabeko Europa batean, non erakunde guztiak ari diren gobernantza modu berriak, antolaketa modu berriak eta lan egiteko eta harremanak izateko modu berriak bilatzen, betiere ingurune konplexu, global eta heterogeneo baten barruan..

Etorkizuna Eraikiz Congress

Posted on by markel

Mundu osoko aditu eta politologoen bermea jaso du atzo eta gaur Etorkizuna Eraikizek, Gipuzkoako Foru Aldundiak bultzatzen duen lurraldearen etorkizuneko erronkei aurre hartzeko ereduak, horretarako elkarlaneko gobernantza baliatuz. Pertsona talde honek Etorkizuna Eraikizen funtzionamendua eta esperientzia lehen eskutik ezagutzeko aukera izan du, atzo eta gaur Donostiako Kursaalean egin den nazioarteko biltzarrean. Ondorio nagusien artean, “ezinbestekotzat· jo dute proiektuaren jarraipena bermatzea eta estrategia egituratzen amaitzea, epe ertain eta luzera Etorkizuna Eraikiz blindatzeko helburuarekin. Proiektuaren eraginaren ebaluazioa modelizatzea eta proiektuaren bilakaerari buruzko datuen eta adierazleen kopurua handitzea dira planteatutako beste hobekuntzetako batzuk.

Etorkizuna Eraikizi esker, gobernatzeko modu berri bat sustraitzen ari da lurraldean. Gobernantza-eredu horretan gizarteak parte hartzen du eta bere etorkizunari eragiten dioten politika publikoetan laguntzen du. Hala ere, ez da geldirik dagoen prozesua, baizik eta sendotzen eta hobetzen jarraitu behar dugu, arlo horretan erreferenteak diren pertsonen ezagutza aurreratuarekin lotuz”, gaineratu du. Bere ustez, egunotan Kursaalen egin den kongresuak balio izan du, hain zuzen ere, nazioarteko adituen ikuspegiak “aberastu eta hasitako bidea are gehiago sendotzen laguntzeko.

Mundu osoko aditu talde hori Etorkizuna Eraikizek biharko egunari begira hartu beharreko lan lerro eta jarduera ildoez eztabaidatzen eta hausnartzen aritu da, kongresuak iraun duen bi jardunaldietan, lau panel edo azpitaldetan banatuta: gobernantza, ongizate-estatuaren etorkizuna, ekonomia iraunkorra eta trantsizio ekologikoa. Lan horren ondorioak ekitaldiaren amaieran aurkeztu dituzte Elena Costasek, ekonomialari, Ksnet-en sortzaileetako bat eta Politikon-en editorea; eta Ander Caballerok, administrazio publikoan eta enpresa-diplomazian aditua. Kongresuaren bi egunetan, 600 pertsonak baino gehiagok parte hartu dute ekimenean.

Badalab hizkuntza eta Gizarte Berrikuntzarako Laborategia

Posted on by markel

Badalab Hizkuntza eta Gizarte Berrikuntzarako Laborategiak datorren urteko maiatzean zabalduko ditu ateak Errenteriako liburutegi zaharrean. Erreferentziazko zentro honek oinarrian izango duen partzuergoa uztailean osatu ostean, proiektua aurrera pauso sendoak eta, batez ere, partekatuak ematen ari da euskal erakunde publikoetako eta euskalgintza sozialeko ordezkariekin batera eta dagoeneko martxan jartzen ari da bere lehen lan lerroak.

          Orain arte egindakoak eta lortutakoak izugarrizko balioa du. Euskarak pauso sendoak eman ditu azken hamarkadetan. Erakunde publikoen eta euskalgintza sozialeko eragileen lanari esker, herritarren atxikimenduak bultzatuta, ezagutza mailak gora egin du eta eremu berriak irabazi ditu hizkuntzak. Baina, etorkizunera begiratzen badugu, aurrean dugun mundua sakonki eta bizkor aldatzen ari den honetan, lankidetza, berrikuntza eta esperimentaziorako gaitasuna biderkatu behar dugu.

          Lankidetza, berrikuntza eta esperimentazio gaitasunean eragin nahi du Badalabek, eta geroan sortuko diren agertoki eta interakzio sistemetan euskara erabiliko dela bermatzea izango du helburu. Mundu osoan zabaltzen ari diren teknologia, paradigma sozial eta ekonomiko berriek modu nabarmenean eragiten diete hizkuntza gutxituei eta txikiei, ez hegemonikoei. Euskara ez da salbuespena. Galdera ikur eta desafioen aurrean, hil ala bizikoa da jomuga berriak eta egitasmo berritzaileak urratzea. Horregatik, nazioartean aitzindaria eta, gure ustez, bakarra den esperientzia abiaraziko du Gipuzkoak, hizkuntzen eta hiztunen arteko berdintasuna lortu nahi duen edonorentzat erreferentzia izango den esperimentazio gune segurua, ausardia babestuko duena.

Etorkizuna Eraikizek 17 proiektu herritar berri babestu ditu aurten

Posted on by markel

Etorkizuna Eraikiz egitasmoko Gipuzkoa Taldean programaren babespean, 17 proiektu herritar esperimental abiaraziko dituzte aurten lurraldeko hainbat elkarte, enpresa eta eragilek, guztira 590.000 euroko diru laguntzarekin. Gipuzkoarron izaera komunitarioan sakontzeko ekimenak izango dira, guztiak ere, eta lau esparru zehatzetan dinamika berriak eta berritzaileak sortzea izango dute helburu: lankidetzazko gobernantza, garapen komunitarioa, gazteen partaidetza eta belaunaldi arteko lankidetza.

Guztiok elkarrekin Gipuzkoako gizarteak etorkizunean izango dituen erronkak hautematea eta horiei aurre egiteko modua diseinatzea, askotariko eragileekin lankidetzan eta esperimentazioan oinarrituta. Horixe da, finean, Etorkizuna Eraikiz foru programaren xedea. Helburu hori lortzeko bidean abian jarritako lan lerroen artean kokatzen da 2016tik, besteak beste, herritarren proiektuak garatzeko diru-laguntza deialdia. Aurtengo edizio honekin, guztira 125 egitasmo esperimental sustatu ditu foru erakundeak urte hauetan guztietan.

Dagoeneko gure gizartea eta lurraldea eraldatzen ari diren ekimenak dira. Guztiok nahi dugun etorkizuneko Gipuzkoa, lehiakorra, solidarioa eta berdea irudikatzeko eraikitzeko lanean bidegile dira. Etorkizunaren aitzindariak, alegia , aurten diruz lagundutako 17 proiektuetako arduradunekin egindako lan jardunaldian. Egitasmo horien guztien berri izan eta ekinbideak partekatu asmoz antolatu du gaurko bilera Foru Aldundiak, Etorkizuna Eraikiz Gunean.

Trantsizio ekologikoko proiektu aitzindaria abiatu du Gipuzkoak, Climate-KIC-ekin

Posted on by markel

Trantsizio ekologikoko proiektu aitzindaria jarri du martxan Gipuzkoak, lurraldea eredu ekonomiko, sozial eta ingurumeneko jasangarriago baterantz mugiarazteko. ‘Gipuzkoako Deep Demonstration’ izeneko esperimentazio aurreratuko prozesuaren eskutik egingo da trantsizio hori. Gipuzkoako Foru Aldundiak sustatzen duen Etorkizuna Eraikiz programak bultzatzen du ekimena, eta Eusko Jaurlaritzaren eta nazioartean erreferente diren bi eragileren laguntza jasoko du: Climate-KIC, Europar Batasunak klima aldaketari aurre egiteko martxan duen ekimen nagusia, eta Ekonomia, Lankidetza eta Garapenerako Erakundea (ELGA). Eragile hauen laguntzarekin martxan jarri dugun prozesuaren helburua da Gipuzkoa esperimentaziorako lurralde aurreratu bihurtzea, hemendik abiatuta trantsizio ekologikoa gauzatzeko.

          Ekimena gaur arratsaldean aurkeztu da, Miramar jauregian egin den bilera batean. Bertan izan dira, diputatu nagusiarekin batera, Kirsten Dunlop, Climate-KICeko zuzendaria; Arantxa Tapia, Eusko Jaurlaritzako Ekonomia Garapen, Jasangarritasun eta Ingurumeneko sailburua; Jose Ignacio Asensio, Ingurumeneko eta Obra Hidraulikoetako foru diputatua; Adolfo Uriarte, Eusko Jaurlaritzako Ondare Natural eta Klima Aldaketako zuzendaria; Alex Boto, IHOBEko zuzendaria; eta Leire Cancio, Agirre Lehendakari Centerreko ordezkaria. Topaketa Climate KICeko ordezkariak aste honetan Gipuzkoan egiten ari diren bisitaren testuinguruan kokatzen da. Honela, aste guztian zehar hainbat lan jardunaldia egiten ari dira, eta bihar eragile industrialekin topaketa egingo da, MUBIL mugikortasun berrirako zentroa bisitatuz.

          Gipuzkoa Deep Demonstration prozesuan, abiapuntua Gipuzkoa Eredua izango da, lehiakortasun ekonomikoa eta kohesio soziala oinarri dituena. Hemendik abiatuta, eta zutabe hauek mantenduz, karbono isurketa maila baxuak dituen ekonomia baterantz trantsizioa burutu nahi du lurraldeak. Gipuzkoako Foru Aldundiaren agendan hizki larriz idatzi den helburua da honakoa: Europa mailan, desberdinkeria gutxien dituen lurraldeen artean kokatzearekin batera, foru erakundearen agendaren erdigunean egongo da datorren hamarkadan zehar, eta guztiz dator bat Eusko Jaurlaritzak bultzatzen duen Euskadi digitalago, berdeago eta inklusiboagoaren eraikuntzarekin.

Aurreko krisialdian desberdintasun sozialak mugatzea lortu genuen; pandemiaren ostean ere hori izango dugu jomuga

Posted on by markel

Pandemiak gipuzkoarren artean utzitako arrasto sakonari eta ondorio sozio-ekonomikoei aurre egiteko garaian, erakundeen eta lurraldeko eragileen erantzun sozialari eta solidarioari eutsi beharra daukagu susperraldia iritsi dadin kolektibo eta pertsona guztiengana. Gipuzkoa COVID-19aren ondoren: balantzea ikastaroa ospatu dugu, eta bertan, pandemiak gehien kolpatu dituen pertsonak eta sektore ekonomikoak babesten jarraitzeko unea dela azpimarratu dugu, aldi berean, lurraldea etorkizunera begira indartzen jarraitzeko proiektuak sustatuz.

Pandemia ostean, zalantzarik gabe, honek behar du izan helburu nagusia: krisiaren ondorio ekonomiko eta sozialak jasaten ari direnak babestea. Azkeneko krisialdian, lortu genuen desberdintasun sozialek gora ez egitea. Oraingo honetan ere horixe bera dugu jomugan. Egungo testuinguruaren koordenatuak aldatu dira, baina norabideari eusten diogu. COVID-19ak utzitako errealitateak beharrizan sozialen olatu bat ekarriko du eta, horien aurrean, tresna berritzaileak sortzearen eta gipuzkoarren izaera komunitarioa indartu behar dugu.

Gipuzkoako herri politiken izaera soziala biderkatzeko unea da. Lurraldeak modu sendoan erantzun die COVID-19ak ekarritako bat-bateko desafioei, erakundeen, gizarte eragileen eta herritarren esfortzuari esker. Gipuzkoak gizarte kapital ikaragarria dauka. Gerora begira, datozen garaiotan, nahitaezkoa izango dugu aberastasun sozial horri eustea. Batetik, gizarte kohesionatu gisa aurrera egiteko. Bestetik, pandemiak utzitako desafio sozio-ekonomikoei erantzuteko.

Badia Berri

Posted on by markel

Badia Berri gizarteratze enpresa bisitatu dugu Lezon eta bertan Elkar Ekin Lanean 2021-2023 Enplegu Inklusiboa eta Kalitatezkoa sustatzeko Gipuzkoako Estrategiak lurraldeari eskaintzen dion aukera aldarrikatu dugu.

Seguru gaude gizarte esklusioari eta desberdinkeriari aurre egiteko modurik eraginkorrena enplegua sustatu eta bazterkeria egoeran dauden pertsonentzat aukerak sortzea dela. Ahalegin horrek Gipuzkoa osoaren konpromisoa behar du, erakundeen, gizarte antolatuaren eta herritarren batasuna, Elkar-Ekin Lanean ekimenaren bitartez lortu nahi duguna; eta Badia Berri enpresan, eredu honek duen potentzialaren adibide argia daukagu.

Badia Berri enpresa 2005 urtean jarri zen martxan, Pasaia, Lezo, Errenteria eta Oiartzungo udalek osatzen duten Oarsoaldea Garapen Agentziak bultzatuta, Gipuzkoako Foru Aldundiaren eta Eusko Jaurlaritzaren laguntzarekin. Hasiera batean Oarsotek izena hartu zuen, eta hasieratik bere helburu sozial nagusia lan merkatuan sartzeko zailtasun bereziak dituzten pertsonak laneratzea izan da. Konpainiaren jarduera nagusia industria prozesu intentsiboen eskulana azpikontratatzea da, eta kautxuzko piezak garbitzea da bere jarduera nagusia. Honela, Badia Berrik baztertuak dauden edo baztertzeko arriskuan dauden pertsonen lan inguruko ikaskuntza ahalbidetzen du jarduera ekonomiko baten bidez.

Gaur gaurkoz, 32 langile ditu enpresak, gehienak emakumezkoak. Ahalegin publiko eta pribatuak batzearen arrakasta kasu argia da Badia Berri. Jarduera ekonomikoaren bidez, babestuko lan ingurune bat eskaintzen die, lan egiteko eta ikasteko arazoak dituzten pertsonei. Hiru urteko iraupena duen insertzio programa planteatzen du Badia Berrik, enplegua eta laguntza soziala barne hartzen dituena. 2005ean enpresa martxan jarri zenetik, 130 pertsona baina gehiago pasa dira bertatik, eta hauetako zatirik handienak lana lortu du Badia Berriko ibilbidea amaitu eta denbora gutxira.

Gipuzkoako HUb turistikoa

Posted on by markel

Foru Aldundiak Gipuzkoako HUB turistikoa aurkeztu du gaur, lurraldeko sektoreko enpresen lehiakortasuna, berrikuntza eta nazioartekotzea hobetzeko lankidetza jarduerak bultzatuko dituen ekimena. Espazio berria Donostiako hiriburuaren erdigunean (Camino kalea, 3) dago kokakuta. HUBak –Etorkizuna Eraikizen 35 proiektu esperimentaletako bat– ibilbidea hasten du asmo sendo batekin: sektorearen lankidetza publiko-pribatua dinamizatzea eta kalitatezko enplegua sortzen duten, Gipuzkoa posizionatzen duten eta lurraldera ekimen eta proiektu berriak erakartzen dituzten enpresa berritzaile berrien garapena bultzatzea.

HUBaren lan-ildo nagusien artean, 4 helburu nagusi nabarmentzen dira: lehenik eta behin, Gipuzkoan turismoaren sektorearen balio katea osatzen duten jarduera-azpisektoreetako enpresen arteko topaketa, lotura eta harremana, ideia berriak, proiektu berriak eta produktu berriak sortzeko; bigarrenik, berrikuntza eta gaikuntza bultzatzea, enpresek beren erronkei erantzun ahal izan diezaieten, batez ere digitalizazioari eta iraunkortasunari lotuta; hirugarrenik, joeren identifikazioa eta turismoaren, merkatuaren eta nazioarteko praktika onak identifikatzea, Gipuzkoako Turismo Behatokiaren jarduerak osatuz; eta, azkenik, negozioaren euskarri zerbitzuak, enpresen egunerokoari laguntzen diotenak, eskuratzea.

HUBa Aldundiaren apustua da sektore guztietan jarduera ekonomikoa indartzeko, gure gizarte ongizatearen eta desberdintasunak murriztearen giltzarri den aldetik: urtez urte, turismoa gero eta garrantzitsuagoa da, batez ere Gipuzkoan. 2019an gure BPGaren % 8 ekarri zuen, EAEko turismo-gastu osoaren % 42,2; 35.000 enplegu baino gehiago sortzen ditu, eta 850 enpresa inguru ditu. Era berean, COVID-19aren krisiak gehien zigortu duen jarduera izan da, murrizketak eta bisitari-kopuruak behera egin baitu azken hamarkadetan ikusi ez den bezala.